Answer:
Ang propesyon ay kadalasanang naiuugnay sa trabaho na pinagkukunan ng sweldo upang matugunan ang mga personal at pangangailangan ng pamilya. Kadalasan, pinaglalaanan ito ng mahabang panahon upang maging dalubhasa sa larangang ito. Ang ilan sa mga halimbawa ng propesyon ay doktor, pulis, artiketko, guro, at iba pa. Ang mga trabahong nangangailangan ng abilidad at kakayahang hinasa ng paaralan ay tinatawag nating propesyon. Dahil din sa naging pagsasanay na pinagdaan mo sa paaralan, nagkakaroon ng pagkakaiba-iba ang sweldo depende sa propesyong iyong kinuha. Mas malaki ang sweldo ng mga doktor dahil mas matagal ang panahon ng kanilang inilaan sa pag-aaral kumpara sa ibang propesyon. Subalit, ang propesyon ay nagiging bokasyon kung ang isang tao ay nagkaroon ng ibang dahilan at rason kung bakit siya naglilingkod para sa iba, liban sa sweldong maaaring makuha. Ang bokasyon ay personal mong udyok na kahit na mababa o walang kapalit na halaga ay gagawin mo parin ang mga kakayahang pinag-aralan mo upang makatulong sa iba.
Mga kaibahan ng propesyon at bokasyon:
Mas malalim ang dahilan ng mga taong pinipili ang bokasyon kaysa propesyon. Kaya ang ilan ay nakakayanang gawin ang mga mahihirap na bagay na wala naman sa kanilang pinirmahang kontrata dahil mas mahalaga sa kanila na makatulong sa kapwa.
Mas malaki ang sweldo ng mga taong pinipili ay propesyon dahil tinatanggap lamang nila ang halagang akma sa kanilang naging pagsasanay sa paaralan. Hindi na maitatanggi na mas natutugunan ang mga pangangailangan kung pipiliin ang propesyon kaysa sa bokasyon dahil ang isa sa mga katangian ng pagpili sa bokasyon ay ang serbisyo na walang kapalit.
Kung minsan ay matatawag nating bokasyon ang sa tingin natin ay ipinagagawa ng Panginoon satin at karaniwang halimbawa nito ay ang paglilingkod sa iba lalo na sa mga hindi nabibigyang pansin ng lipunan.
Sa panahon natin ngayon, kung ikaw ay masaya sa iyong trabaho kahit na mahirap at nakakapagod pa ito, matatawag natin itong bokasyon at hindi propesyon. Kadalasan naman, marami ang tumitigil na sa trabaho at kanilang propesyon dahil hindi natutugunan ng trabaho ang mga pangangailangan ng isang empleyado.
Ang pagpili ng bokasyon o propesyon ay magagawa lamang ng isang tao ayon sa kanyang mga prayoridad sa buhay. Hindi rin natin maaaring sabihing mali ang kanilang mga naging desisyon dahil magkakaiba tayo ng mga nararanasan at pinagdaraaanan sa buhay. Ang mahalaga, alam mo kung ano ang hinaharap na nais mong makamit sa pamamagitan ng pagsisikap at pagpupunyagi.
